படித்த இளைஞர்களை முதல் தலைமுறை தொழில் முனைவோராக்கும் புதிய திட்டத்தில் தகுதியுள்ள இளைஞர்கள் விண்ணப்பிக்கலாம் என சென்னை மாவட்ட ஆட்சியர் வெ.அன்புச்செல்வன் அறிவித்துள்ளார்.இதுதொடர்பாக நேற்று அவர் வெளியிட்ட செய்திக்குறிப்பு:
படித்த இளைஞர்களுக்கு பயிற்சி அளித்து அவர்களை முதல் தலைமுறை தொழில் முனைவோராக உருவாக்கும் நோக்கில் தமிழக அரசு ‘புதிய தொழில் முனைவோர் மற்றும் தொழில் நிறுவனம் மேம்பாட்டுத் திட்டம்’ (NEEDS) என்ற புதிய திட்டத்தை அறிவித்துள்ளது.
இத்திட்டத்தின்கீழ் ஐடிஐ பட்டய படிப்பு, இளங்கலை பட்டம் அல்லது இதற்கு மேற்பட்ட கல்வி தகுதி பெற்றிருப்போருக்கு ஒரு மாதம் தொழில் முனைவோர் பயிற்சி அளித்து தொழில் திட்டம் தயாரிக்க உதவி செய்யப்படும். தொடர்ந்து, வங்கிகள் அல்லது தமிழ்நாடு தொழில் முதலீட்டு கழகம் மூலம் கடன் பெறவும் வழிவகை செய்யப்படும்.
இத்திட்டத்தின்கீழ் தொழில் தொடங்கும் தொழில் முனைவோருக்கு தொழில் திட்ட மதிப்பீட்டில் 25 சதவீதம் அல்லது அதிகபட்சமாக ரூ.25 லட்சம் வரை முதலீட்டு மானியமும், 3 சதவீத வட்டி மானியமும் அளிக்கப்படும்.
இத்திட்டத்தின்கீழ் குறைந்தபட்சம் ரூ.5 லட்சத்துக்கு மேல் அதிகபட்சமாக ரூ. ஒரு கோடி வரையிலான அனைத்து உற்பத்தி சார்ந்த தொழில்கள் மற்றும் சேவை தொழில் தொடங்கலாம். பொது பயனாளி தனது பங்காக திட்ட மதிப்பீட்டில் 10 சதவீதமும், சிறப்பு பிரிவு பயனாளிகள் 5 சதவீதமும் செலுத்த வேண்டும். வணிக வங்கிகள், தாய்கோ வங்கி, தமிழ்நாடு தொழில் முதலீட்டு கழகம் மூலம் கடனுதவி பெற பரிந்துரை செய்யப்படும்.
தகுதியுள்ள படித்த இளைஞர்களிடமிருந்து விண்ணப்பங்கள் பெறப்பட்டு, மாவட்ட ஆட்சியர் தலைமையிலான தேர்வு குழுவால் பயனாளிகள் தேர்வு செய்யப்படுவர். தகுதிகளையுடைய, ஆர்வமுள்ள இளைஞர்கள் மண்டல இணை இயக்குநர், திருவிக தொழிற்பேட்டை, கிண்டியில் உள்ள அலுவலகத்தில் விண்ணப்பப் படிவம் பெற்று விண்ணப்பிக்கலாம்.
மேலும், www.msmeonline.tn.gov.in என்ற இணையதளத்தில் NEEDS திட்டத்தில் விண்ணப்பித்து அதன் நகல்கள் இணைப்புகள் உடன் இரண்டு நகல்கள் இவ்வலுலகத்தில் சமர்ப்பிக்க வேண்டும். மேலும், விவரங்கள் அறிய 044-22501620, 21, 22 என்ற தொலைபேசி எண்களிலும் தொடர்பு கொள்ளலாம்.
இவ்வாறு அவர் தெரிவித்துள்ளார்.
No comments:
Post a Comment